A portavoz nacional do BNG, Ana Pontón, asegurou este mércores que a Comunidade necesita “máis que nunca” ter “voz propia” en Madrid para “facer valer Galicia”, polo que pediu unir todo o voto “en clave galega e de progreso” no Bloque nas próximas eleccións xerais.
“Temos que converter a inutilidade das forzas estatais nunha oportunidade de que Galicia volva ter peso político da man do BNG”, recalcou Pontón nun mitin na localidade pontevedresa de Ponteareas, tras destacar que no 28A ese obxectivo quedou “ao alcance das mans” e, por iso fixo un chamamento para saír “a por todas”.
A líder nacionalista insistiu en canalizar “o cabreo” pola repetición electoral nunha votación masiva nas urnas, “porque non é o momento da abstención senón da participación, o momento de facer algo diferente apostando polo Bloque”.
“Quero pedirvos a toda a militancia e simpatizantes, a todas as persoas que pensan que Galicia necesita ter voz propia que poñamos as pilas, porque hai que saír a gañar este partido, porque non é un reto do BNG senón do país”, apostilou Ana Pontón no mitin, segundo recolle a súa organización política nun comunicado.
Para o BNG, o bipartidismo PP-PSOE e as súas “sucursais galegas” están “a quitar” o futuro a Galicia. “Os que din defender Galicia, os que din que nos traen cousas, pero en realidade levan a nosa riqueza“, lamentou. Por iso, recalcou a necesidade de “organizacións políticas libres” e a “única”, ao seu xuízo, que pode cambiar as cousas é o BNG.
“Nin o PP, nin o PSOE, nin Podemos, como comprobamos cando pactaron con Pedro Sánchez os peores orzamentos do Estado para Galicia en 20 anos, defenden a Comunidade. O problema non é só que decidan por nós, é que deciden en contra nosa”, criticou Ana Pontón.
PROBLEMAS DOS GALEGOS
No mesmo acto, a cabeza de lista do BNG por Pontevedra, Carme da Silva, insistiu en que de face ás eleccións é necesario falar “dos problemas dos galegos” en lugar de discutir sobre a política madrileña.
“Estas eleccións deben ir de eliminar peaxes abusivas na AP-9, cunha concesionaria que presume de que vai incrementando os seus beneficios anos tras ano, xa que o Condado Paradanta é un dos territorios máis afectados pola estafa”, sentenciou da Silva.
