Representantes da CIG, encabezados polo secretario comarcal de Vigo, Alberto Gonçalves, presentaron este luns por rexistro en Zona Franca unha solicitude para manter unha reunión “urxente” co delegado do organismo estatal, David Regades, co fin de abordar a posta en marcha de medidas que melloren a seguridade viaria no polígono industrial de Balaídos.

Segundo relatou Gonçalves, a CIG elaborou un informe con achegas dos delegados de Prevención que o sindicato ten nas empresas, no que se constatan numerosas “deficiencias” que poñen en risco a seguridade das persoas que traballan na zona.

Así, algunhas desas son os problemas derivados da falta de aparcadoiro, o estacionamento indebido de vehículos, a escasa ou nula iluminación nalgúns tramos, ou a ausencia de accesos peonís seguros.

A CIG, tras lembrar que o estado do polígono provocou xa incidentes e “algúns accidentes” nas vías de acceso e nos arredores do recinto de Zona Franca en Balaídos, pediu tamén que se adecue o acceso peonil desde Navia, e que se constrúa un carril bici, tanto de acceso como de mobilidade interior.