A delegada territorial da Xunta en Vigo, Corina Porro, acusou este luns ao alcalde, Abel Caballero, de “inventarse” vertidos e outros datos “falsos” para prexudicar a candidatura de Illas Atlánticas a Patrimonio da Humanidade, promovida polo Goberno galego e “a única” rexistrada ante a Unesco.
Porro lamentou que “o mantra das 12” do rexedor olívico “chega á paranoia”, na súa “obsesión polo ataque permanente contra outra institución e o seu presidente”.
A ese respecto, a delegada da Xunta acusou a Caballero de “faltar á verdade” e de “enganar á cidadanía”, ao “inventarse verteduras cando se trata de áridos, que están fóra da illa de Sálvora, e cando as análises de auga alí din que a calidade é excelente”. Ademais, engadiu Porro, os depósitos deses áridos “autorízaos o Ministerio e (o alcalde) culpa ao presidente Feijóo”.
Así as cousas, Porro concluíu que Abel Caballero “se está convertendo nun auténtico inimigo da cidade” e, ademais, “está a dar argumentos para que esta candidatura (a da Xunta), a única rexistrada, a tiren abaixo, e con datos falsos”.
A representante do Goberno galego en Vigo lembrou que esta iniciativa do executivo autonómico “xa superou a primeira proba”, e lamentou que, en lugar de “ir collidos da man” coa Xunta, o goberno local encabezado por Abel Caballero pon “cambadelas”.
