Profesionais sanitarios do municipio de Baiona recibirán este xoves, 8 de agosto, unha homenaxe tras a tradicional comida de verán da Asociación de Médicos Galegos (Asomega).
Segundo informou Asomega, entre os homenaxeados atópase o conselleiro de Sanidade, Jesús Vázquez Almuiña, “recoñecido polo seu exemplar labor na atención sanitaria da área de Baiona, a promoción do decálogo da Dieta Atlántica e o seu compromiso permanente coa sanidade galega”, destacou a entidade.

Ademais, sinalou a organización, o evento contará coa presenza do presidente do Parlamento de Galicia, Miguel Anxo Santalices Vieira; así como do alcalde de Baiona, Carlos Gómez Prado; o director xeral do Grupo Coren, Emilio Rial; e o presidente de Asomega, Xullo Ancochea Bermúdez, entre outras personalidades. A homenaxe está prevista a partir das 16,30 horas deste xoves no Restaurante Rocamar, en Baiona, onde, previamente, ás 14,30 horas, terá lugar a comida de verán de Asomega.