O conselleiro do Medio Rural, José González, e representantes de catro comunidades de montes (Zamáns, Coruxo, Valadares e San Andrés de Comesaña), así como da Mancomunidade de Montes de Vigo, asinaron este martes un convenio de colaboración para a cesión de espazos forestais para a súa rexeneración e que foron afectados os incendios de outubro de 2017.

Tras a firma do convenio, polo que a Xunta achegará 1,3 millóns de euros nunha primeira fase, o conselleiro explicou que o obxectivo deste acordo é, no período 2019-2021, crear un bosque periurbano, que sirva de barreira natural de protección ao redor da cidade, e que teña valor en si mesmo como espazo natural, de lecer e rendible para os propios comuneiros.

Así, para lograr a restauración integral da masa forestal (unhas 1.600 hectáreas), iniciaranse as actuacións con medidas como a plantación de especies frondosas e coníferas (máis resistentes ao lume), colocación de peches, eliminación de acacias e eucaliptos, etc. José González explicou que a intención da Xunta é estender este modelo a outras cidades de Galicia, e mesmo chegar ata as parcelas de propietarios individuais.

COLABORACIÓN CO CONCELLO

Así mesmo, o conselleiro de Medio Rural apelou á colaboración do Concello de Vigo para coordinar esta actuación co proxecto de ‘Anel Verde’ que pretende pór a marcha o goberno municipal de Abel Caballero.

José González prometeu que o seu departamento informará “canto antes” o proxecto remitido desde o Concello olívico e insistiu na necesidade de que ambas as administracións vaian da man, tanto nesta iniciativa como noutras (como a limpeza de franxas).

Pola súa banda, o presidente da Mancomunidade de Montes de Vigo, Uxío González, incidiu en que esta actuación promovida desde a Xunta é “compatible” co proxecto municipal, e celebrou o “cambio” na actitude do Goberno galego. “Se hai un ano denunciamos que sentiamos abandonados pola Xunta, agora houbo un cambio que agradecemos, e que vén consolidar todo o traballo feito xa polas comunidades de montes”, sinalou.