O secretario xeral de Anfaco-Cecopesca, Juan Vieites, inaugurou unha exposición que acolle a sede da entidade en Vigo e que, segundo explicou, percorre o “traballo incansable” que permitiu o levantamento das conserveiras galegas.
Durante o acto de inauguración, celebrado este venres, indicou que a colección mostra a pesca como un “factor económico” dentro da comunidade, así como o modo no que se desenvolvía o traballo nas fábricas ligadas a este sector.
Tamén detallou que a mostra se configurou mediante as doazóns de pezas e fotografías por parte de Tomás Massó, descendente do fundador da conserveira Massó. Así, Juan Vieites recoñeceu o traballo desta empresa, á que definiu como un “exemplo” de “compromiso” coa industria galega e resaltou a súa importancia a nivel internacional. Na mesma liña, o presidente da patronal conserveira, Juan Manuel Cerqueira, destacou a “dedicación” da familia Massó ao sector e lembrou como a súa “historia” estivo ligada ao mesmo.
CREACIÓN DA INDUSTRIA
Así mesmo, Tomás Massó lembrou o “esforzo” e a “aventura” dos “pioneiros” procedentes de lugares como Cataluña e Italia que se trasladaron a Galicia, onde “foron capaces de crear unha industria que non había”.
Deste xeito, puxo en valor a “evolución” da empresa da súa familia desde a creación dunhas fábricas de salgadura no século XIX en Bueu ata a aposta pola industria conserveira.
O concelleiro de Facenda no Concello de Vigo, Jaime Aneiros, remarcou tamén o feito de que Anfaco apostase por acoller unha exposición que une a “tradición”, a “cultura” e a “modernidade” da cidade.
Así mesmo, a directora xeral de Pesca, Mercedes Rodríguez, asegurou que este sector é un “exemplo de internacionalización”, pero tamén de “innovación” e “mellora” da calidade do produto.