A directora de Turismo de Galicia, Nava Castro, participou este domingo nos actos do Corpus Christi da localidade pontevedresa de Ponteareas, unha das 11 festas de Interese Turístico Internacional coas que conta a Comunidade e na que este ano a Xunta incrementou a súa colaboración cunha achega de 60.000 euros.
Nava Castro asistiu aos actos convocados no Concello, así como á misa e posterior procesión. Nesta xornada, as rúas deste municipio énchense de cor coas alfombras florais realizadas durante a noite polos seus veciños despois do traballo de preparación nas últimas semanas.
“Trátase dunha celebración que cada ano conta co respaldo da Xunta e no que o investimento deste ano permite apoiar distintas accións de loxística e promoción, iluminación, son e imaxe, gastos de flor e recollida de materiais para alfombristas, actividades de animación infantil, carrozas, actuacións musicais e diferentes actividades promocionais”, indicou o Goberno galego nun comunicado.
Na marxe desta colaboración, tamén se incorpora como novidade a posta en marcha da campaña de información e sensibilización fronte á violencia sexual en espazos públicos: ‘Agresión Off, eu digo non á violencia sexual’. Esta iniciativa forma parte do acordo con Vicepresidencia e Consellería de Presidencia, Administracións Públicas e Xustiza, no marco do Pacto de estado contra a Violencia de Xénero.
