O BNG presentou este venres en rolda de prensa un conxunto de 20 medidas que expón ao goberno municipal de Vigo para a súa aplicación nos primeiros cen días de mandato, e que inclúen propostas como iniciar a redacción dun novo regulamento de participación cidadá, tramitar a cesión de pisos da Sareb para facer un parque municipal de vivendas, ou pór en marcha unha renda social municipal.

Segundo explicou en rolda de prensa o concelleiro electo do BNG, Xabier Pérez Igrexas, trátase de “propostas en positivo” que inciden en “problemas reais” dos veciños de Vigo e que non foron atendidas nos últimos anos.

Así, o BNG propuxo iniciar a redacción dun novo regulamento de Participación Cidadá, que inclúa a creación de consellos veciñais; demandar á Sareb a cesión de uso de pisos baleiros para crear un parque municipal de vivendas; iniciar o proceso para pór en marcha unha renda social municipal en 2020; comezar a elaboración de proxectos para 3 novas escolas infantís; ou tomar medidas para paliar o colapso no departamento municipal de Servizos Sociais.

Os nacionalistas tamén propoñen un plan de choque contra o desemprego xuvenil; modificar as ordenanzas para implementar unha “fiscalidade municipal xusta”, para que os impostos gañen en progresividad; ou apostar polos orzamentos participativos.

Ademais, o BNG expón iniciar a redacción dun novo Plan Xeral de Ordenación Municipal (PXOM), coa “máxima transparencia e participación veciñal”; abrir o Centro de Arte Fotográfica do Casco Lanuxe; iniciar a elaboración dunha ordenanza de protección animal; ou crear un programa de información e atención ao colectivo LGTB, entre outras medidas.