O grupo municipal Marea de Vigo denunciou este venres a “inacción” do goberno local ante as “obras ilegais” que se están facendo na Avenida da Florida para a apertura dunha nova casa de apostas. O portavoz do grupo, Rubén Pérez, lembrou que o Pleno do Concello olívico aprobou en febreiro unha moción na que se instaba ás administracións local e autonómica a “realizar unha actuación activa e non colaborativa con este tipo de negocios“.

A obra á que fai alusión neste caso está a levarse a cabo en Avenida da Florida 73, unha obra que “carece de licenza municipal, algo que xa foi denunciado pola veciñanza” e que, ademais, está a facerse preto dun centro educativo (un conservatorio). Marea de Vigo volveu a alertar sobre a “proliferación” destes negocios na cidade e urxiu o cumprimento do acordo plenario, e a ser “consecuentes coas declaracións do propio alcalde, que en abril instaba á Xunta a realizar un veto a estes negocios”.