InicioPolíticaO Concello de Vigo recoñece conflito de intereses en contratos vinculados cun...

O Concello de Vigo recoñece conflito de intereses en contratos vinculados cun funcionario condenado por prevaricar

O PP anuncia que levará á Fiscalía este "novo escándalo" de "corrupción" do goberno de Abel Caballero

PUBLICADO O

A Xunta de Goberno Local de Vigo aprobou o desistimento de dous contratos por concorrer un conflito de intereses, ao ser adxudicados a unha empresa vinculada a un familiar directo do alto funcionario Francisco Javier G.O., quen participou no proceso de adxudicación.

Segundo denunciou este luns o grupo municipal do PP, trátase dun “novo escándalo” de “corrupción” no seo do goberno de Abel Caballero xa que, segundo lembrou o concelleiro Miguel Fidalgo, o funcionario implicado foi condenado pola Audiencia de Pontevedra a 5 anos de cárcere por prevaricación (no caso do ‘enchufe’ da cuñada de Carmela Silva, presidenta da Deputación de Pontevedra, nunha concesionaria municipal).

Os feitos remóntanse a principios de marzo, cando o propio Fidalgo, na mesa de contratación, puxo de manifesto a posible existencia dun conflito de intereses, xa que se estaba tramitando a adxudicación de dous contratos (un de formación en internet e outro de mantemento de aplicacións informáticas) a unha empresa cuxo administrador é socio, noutra compañía, dun fillo deste funcionario.

Realizadas as xestións, o servizo de Contratación do Concello de Vigo elaborou un informe no que se conclúe que si existiu ese conflito de intereses pola relación do funcionario coa empresa, e no que se pon de manifesto que este técnico municipal participara na valoración das ofertas para estes contratos e na preparación da documentación.

Así as cousas, os técnicos municipais propuxeron á Xunta de Goberno Local desistir destes dous contratos, unha medida que debe ser comunicada aos licitadores que participan en ambos os procedementos de adxudicación.

“ESCÁNDALO” DE “CORRUPCIÓN”

O grupo municipal do PP, que denunciou este luns este “escándalo” de “corrupción”, advertiu de que o funcionario implicado “leva catro anos” contratando con esa empresa, vinculada cun socio do seu fillo, e realizou adxudicacións por valor duns 400.000 euros.

Ademais, lembrou que este traballador municipal foi condenado por favorecer contratacións irregulares cunha concesionaria municipal para que esta dese emprego a unha cuñada de Carmela Silva; un “enchufe” que “custou aos vigueses 128.000 euros, que aínda non foron devoltos”.

Finalmente, Miguel Fidalgo advertiu de que o goberno local de Vigo ten “a marca de España” de concelleiros “procesados e imputados”, e chamou á cidadanía a votar o próximo 26 de maio para cambiar ese goberno por un “honrado, honesto e que traballe polos vigueses”.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...