Marea de Vigo propuxo este venres que a cidade sera “territorio antitaurino”, “libre de caza” e que se permita viaxar ás mascotas no transporte público, ademais doutras medidas relacionadas co benestar animal.

Así o trasladou o candidato da formación á Alcaldía de Vigo, Rubén Pérez Correa, quen se reuniu este venres con representantes dos traballadores de Vigozoo, para trasladarlles as propostas de Marea e escoitar as súas suxestións.

O candidato, que estivo acompañado por outros membros da súa lista e polo coordinador de Libera e Fundación Franz Weber en Galicia, Rubén Pérez Sueiras, avogou porque Vigo sexa “unha cidade que facilite a vida cotiá ás persoas que teñen animais de compañía e non permita ningún tipo de malos tratos aos seres vivos“.

Por iso, esta formación propón, entre outras cousas, unha reforma de Vigozoo para que se acolla á iniciativa ZooXXI, unha proposta internacional para reconverter os zoolóxicos en espazos de refuxio, atención e asistencia a animais feridos, incautados en explotacións ou abandonados.

Tamén expón que os animais de compañía poidan viaxar en transporte público, como en moitas cidades de Europa; que se prohiban as corridas de touros e os circos con animais; ou a caza.