A oficina técnica de mantemento do departamento de Pintura da planta do Grupo PSA en Vigo desenvolveu o proxecto ‘Big Data Pintura Vigo’ co obxectivo de implantar un sistema que permite recoller, analizar e utilizar máis de tres millóns de datos diarios no proceso de pintura para mellorar a eficiencia na produción, segundo informou a compañía nun comunicado.

Desenvolvido en colaboración co Centro Tecnolóxico de Automoción de Galicia (CTAG), este proxecto baséase nun software que recolle os datos relacionados co vehículo (temperatura da cabina, atmosfera, humidade, parámetros das pinturas, tempos de cocción, etc.), que se cruzan cos resultados de calidade de cada carrozaría pintada.

A análise destes datos mediante algoritmos de intelixencia artificial permite identificar posibles problemas e establecer os parámetros ideais para optimizar o proceso produtivo. A compañía afirma que xa se atoparon melloras nos tempos de permanencia de carrozarías en determinadas zonas e no proceso de limpeza das cabinas.

‘Big Data Pintura Vigo’, que comezou a aplicarse a finais de 2018 nas cabinas de lacas da planta de Vigo, xa está a funcionar en todo o proceso de pintura e actualmente trabállase na adaptación desta metodoloxía para a súa implantación noutros talleres produtivos da fábrica.

Este proxecto enmárcase no referencial de Fábrica 4.0 do Grupo PSA, que busca a eficiencia a través da integración dos novos conceptos de dixitalización e as novas tecnoloxías.

“Este proxecto será, nun futuro moi próximo, unha ferramenta fundamental de apoio ao noso persoal técnico no coñecemento e dominio do noso proceso produtivo, o que nos permitirá producir coa mellor calidade, custo e prazo”, sinalou o responsable do proxecto “Big Data Pintura Vigo”, José Angel Castro.