O alcalde de Vigo, Abel Caballero, expresou este martes o seu apoio ao reitor da Universidade olívica “na súa demanda de que non se rompa o pacto” entre as universidades galegas acerca da implantación da titulación de Robótica. En caso contrario, é dicir, se se implanta este grao en Lugo, pedirá “de inmediato” que Vigo teña facultade de Medicina.

Así o trasladou o rexedor olívico nunha rolda de prensa, na que lembrou que xa se imparten contidos de Robótica en Vigo e Ferrol (o acordo sobre titulacións contemplaba para Lugo un grao de Robótica Agroforestal, non xeralista). Entende que esa oferta “debe ser suficiente” no sistema universitario galego.

“Se se rompe o pacto, nós reclamaremos de forma inmediata unha facultade de Medicina”, proclamou o alcalde, quen lembrou que en Vigo hai suficiente demanda para eses estudos, ademais de infrastrutura hospitalaria.

En todo caso, Abel Caballero matizou que ía “reclamar igual” esa titulación para a cidade, aínda que “se pode esperar un tempo”. Con todo, insistiu en que se o acordo non se respecta, non haberá ese período de agarda.