O grupo municipal Marea de Vigo anunciou este xoves que pedirá por escrito ao goberno de Abel Caballero a creación dunha comisión de investigación sobre os contratos que xestionou o funcionario condenado a cinco anos de cárcere por prevaricación e malversación (en relación coa contratación dunha cuñada de Carmela Silva nunha concesionaria municipal).

Nunha rolda de prensa, o portavoz da formación, Rubén Pérez Correa, volveu insistir en que o pleno extraordinario celebrado a petición do PP por esa sentenza, debería servir para que se investiguen e se desterren prácticas como as “prebendas e os favores” presentes entre os altos funcionarios. “Pero non se quere investigar o alcance dos contratos que xestionaba este funcionario (o que foi condenado pola Audiencia)”, lamentou.

Por iso, avanzou que o seu grupo volverá pedir a creación de unna comisión de investigación, esta vez por escrito, porque dita creación “ten que ser unha decisión política” do alcalde e o seu equipo de goberno. Esta comisión debe profundar, a xuízo de Pérez Correa, non só nas actuacións dese traballador, senón nas prácticas doutros altos funcionarios, e no sistema de provisión de postos de alta responsabilidade.