O grupo municipal do PP no Concello de Vigo cualificou como “vergoña” a convocatoria do pleno extraordinario sobre o ‘enchufe’ da cuñada de Carmela Silva a continuación da sesión ordinaria mensual, e denunciou que Abel Caballero e o seu tenente de alcalde (e presidenta da Deputación de Pontevedra) pretenden “tapar o escándalo”.

Nunha rolda de prensa, a portavoz ‘popular’, Elena Muñoz, criticou que se relegue esa sesión extraordinaria, solicitada polo PP, a un segundo plano, convocándoa despois dun pleno ordinario. “Vólvense a rir dos vigueses e da Corporación. Fano para tentar tapar o escándalo, queren que se esqueza, que pase desapercibido”, recalcou.

A ese respecto, a concelleira lembrou que o ‘enchufe’ da familiar de Silva foi “constatado por unha sentenza xudicial, non o di o PP”, e que Carmela Silva “non só non deu explicacións, nin adoptou a única medida digna, que sería marcharse, senón que pretende dar leccións”.

Ademais, Elena Muñoz advertiu de que o alto funcionario condenado nesa sentenza (a 5 anos e 3 meses de prisión, e inhabilitación por 9 anos) “segue aquí coma se nada” e “non foi apartado”. “Que están a tentar tapar? Claro, como o que vai ir ao cárcere é un funcionario, mentres ela (Silva) está no seu chalecito de Toralla…”, rematou a portavoz do PP.

PLENO CONVOCADO “LEGALMENTE”

Mentres, o goberno municipal defendeu a súa actuación e subliñou que o pleno extraordinario foi convocado “en tempo e forma, segundo a marca o regulamento” e que dita convocatoria é unha prerrogativa do alcalde.

O portavoz socialista, Carlos López Font, insistiu en que se fixo esa convocatoria “legalmente”, e engadiu que é “razoable” que a sesión se celebre tras o pleno ordinario, por cuestións de “axenda” e “ocupacións” dos 27 membros da Corporación. “Non entendemos por que se queixan”, sentenciou.