Máis de 20.000 afeccionados aos coches e motos clásicas visitaron o Salón Retro Galicia, que pecha este domingo a súa novena edición celebrada no Instituto Feiral de Vigo este fin de semana.
“Esta edición que termina foi un bo exemplo de que en Galicia hai moitos afeccionados aos vehículos clásicos e de que existen grandes coleccionistas, o que vaticina unha longa vida a Retro Galicia”, asegurou o director do certame, José Enrique Elvira.
Tal como sinalou a súa organización nun comunicado, a cita terminará cun balance de asistencia superior aos 20.000 visitantes, “o que certifica o bo momento desta feira”. “Este ano a mostra de vehículos clásicos galega contou con moitas referencias a Vigo, o que ademais redundou nunha maior satisfacción da afección e do público local”.
A homenaxe aos pilotos galegos Chano Carrera e Manuel Sanjurjo foi un dos actos “máis emotivos”, así como a exposición do autobús Cometa, que formaba parte da frota do transporte público de Vigo hai 50 anos.
Tamén se levou a cabo unha mostra homenaxe a Citroën, con motivo da celebración do centenario da marca francesa. Así expuxéronse 22 coches desta compañía, como o Citroën Ligero 11, o Visa, o CX, o SM ou os 2 CV.
“A feira deste ano foi especialmente emotiva pola abundante cantidade de símbolos relacionados con Vigo e iso notouse entre os asistentes, que ademais eloxiaron nas redes sociais a calidade dos coches e motos traídas”, destacou Elvira.
