O Eixo Atlántico criticou duramente este venres o informe que o Consello Económico e Social de Galicia (CES) presentará a próxima semana sobre a integración da Comunidade galega no Corredor Atlántico, e advertiu de que o documento “chega tarde e mal”, “non está consensuado” e mesmo recolle propostas “peligrosísimas”.

Así o trasladou o secretario do Eixo, Xoán Vázquez Mao, nunha comparecencia ante os medios, tras manter unha reunión co portavoz de En Marea, Luís Villares. Vázquez Mao confirmou que o Eixo tivo acceso a este informe, que comparou con “un mal traballo de alumno de BUP” –pola ausencia de análise económica ou técnico, entre outras “omisións”–, e criticou que, á luz do documento, “parece que o Corredor Atlántico só existe desde que Feijóo se reuníu cos presidentes de Asturias e de Castela e León”.

“O Corredor ten 20 anos, e houbo moita xente facendo todo un proceso de traballo. Sinto que o CES se incorpore agora á precampaña electoral”, proclamou o secretario do Eixo, quen engadiu que, ademais de ser “puramente propagandístico”, tamén é un informe “tardío”, porque xa en xullo pasado a Comisión Europea aprobou a incorporación de Galicia a ese corredor.

PROPOSTAS “PERIGOSÍSIMAS”

Por outra banda, Vázquez Mao alertou achega as propostas “perirosísimas” que se expoñen nas conclusións do informe. Así, recalcou que se volve a pór sobre a mesa a necesidade de complementar o eixo Vigo-O Porto cunha liña entre A Coruña, Xixón e Bilbao.

“Volvemos caer outra vez no erro do esquema de ‘tres aeroportos”, aseverou o secretario do Eixo, quen incidiu en que xa existía un consenso hai anos sobre a conveniencia de unificar os tráficos de mercadorías de todos os portos nunha soa liña de saída de Galicia, por Monforte.

O Eixo denunciou que estas formulacións do CES, “que non foron discutidos nin consensuados con ninguén”, impedirán que haxa unha masa crítica no transporte de mercadorías que poida atraer a operadores. “A saída única de mercadorías por Monforte é unha posición xa aceptada desde a época de Fraga, e o máis absurdo (do informe do CES) é que altera unha posición que a Comisión Europea xa oficializó”, engadiu.

“Estamos a tirar pedras contra o noso propio tellado (…), este documento nace morto, non está consensuado, chega tarde e mal. É un documento preelectoral ao servizo dos intereses de só unha parte de Galicia”, sentenciou.