A portavoz nacional do Bloque Nacionalista Galego (BNG), Ana Pontón, avanzou que o grupo parlamentario da súa formación defenderá este martes no Parlamento de Galicia unha iniciativa na que reclamará que o Estado invista na depuración e o saneamento da ría de Vigo.

Nunha rolda de prensa que tivo lugar este venres en Vigo, Pontón resaltou a necesidade de reclamar “maiores investimentos” de “todas as administracións” para garantir unha “ría sen verteduras” e asegurou que espera que todos os grupos parlamentarios da Cámara galega se unan a esta reivindicación.

Neste sentido, destacou a importancia da ría como “motor económico” das localidades da zona e sinalou as “responsabilidades” da Xunta respecto diso. Ademais, instou á Administración autonómica a realizar a repartición dos fondos do canon de saneamento dun modo “transparente”.

Así mesmo, o candidato do BNG á Alcaldía, Xabier P. Igrexas, explicou que o “problema” da ría de Vigo é que a recollida das augas fecais e as pluviais “non están separadas”. Ademais, asegurou que a Estación Depuradora de Augas Residuais (EDAR) non é suficiente para evitar a contaminación do mar.

A eurodeputada do BNG, Ana Miranda, sinalou que, hai dúas semanas, abordouse o saneamento das rías de Vigo e O Burgo en Bruxelas e que a Comisión Europea recoñeceu que a primeira non está “saneada completamente”. Ademais, reprobou que o alcalde, Abel Caballero, negase que a ría estea contaminada e lembroulle que o Partido Socialista Europeo “apoiou a apertura dun informe” respecto diso.