A portavoz nacional de BNG, Ana Pontón, esixiu á Xunta de Galicia un “plan de mellora” da Atención Primaria dotado para 2019 con “200 millóns de euros” porque sinalou que “é falso” que non haxa médicos e que é necesario pór “máis recursos” a disposición da sanidade pública.
Ana Pontón, xunto á deputada nacionalista Montse Prado e o candidato á Alcaldía de Vigo, Xabier Pérez Igrexas, reuniuse este mércores en Vigo con representantes da xunta de persoal do Chuvi, do comité de empresa de Povisa, persoal de Ambulancias e de Alcer (Asociación de Hemodiálisis) e representantes dos PACs en pé de Guerra.
“Ten que haber un cambio de modelo, as EOXIs fracasaron e hai que volver ás xerencias de Atención Primaria con recursos e con capacidade de decisión porque o resto van ser parches”, manifestou a portavoz nacionalista, que defenderá este plan no Parlamento de Galicia.
“A deterioración brutal da sanidade pública está a converterse nun perigo para a saúde”, sostivo Pontón, quen criticou que o goberno de Núñez Feijóo recortou “2.000 millóns de euros á atención sanitaria de primaria” e que a Atención Primaria a día de hoxe ten un orzamento con “188 millóns de euros menos que hai dez anos”.
MANIFESTACIÓN EN VIGO
Ana Pontón mostrou o seu apoio á mobilización convocada para este xoves en Vigo para defender a dignidade da sanidade pública e tamén destacou a convocatoria de febreiro no ámbito galego. Segundo a nacionalista, os profesionais desde a Atención Primaria, os PACs, os traballadores de Povisa, os servizos de urxencias dos hospitais, o persoal das ambulancias e os propios pacientes “non protestan porque si”.
“É imposible que todo o mundo amenta menos Feijóo. É evidente que quen nos está contando unha milonga é el e isto demóstranos que o único que lles importa é que os seus amigos sigan facendo negocio á conta da sanidade pública“, aseverou Pontón.
Pola súa banda, o candidato do BNG en Vigo, Xabier Pérez Igrexas, chamou a unha “participación masiva” na manifestación deste xoves na cidade olívica e puxo o foco en que a atención primaria está “ao bordo do colapso”.
“O persoal do transporte sanitario transmitiunos que Vigo ten a metade das ambulancias que lle corresponderían polo seu nivel de poboación”, apuntou Pérez Igrexas, que cualificou á cidade como a “zona cero” do “desastre sanitario” do conxunto de Galicia.
