A Policía Local de Vigo iniciou dilixencias xudiciais contra un home de 31 anos de idade, nacido na Coruña e domiciliado en Vigo por un suposto delito contra a seguridade viaria despois de que os axentes o viran circular en dirección contraria.
Os feitos producíronse pasadas as 2,50 horas do pasado domingo, cando uns policías que patrullaban pola rúa García Barbón cara a Isaac Peral se detiveron nun semáforo e observaron como un turismo da marca Audi A3 se achegaba a gran velocidade en sentido contrario.
O vehículo freou de forma brusca para evitar pasar o semáforo en fase vermella. Foi neste momento cando os policías lle deron o alto para proceder á súa identificación e se decataron de que presentaba claros e evidentes signos de estar baixo a influencia de bebidas alcohólicas.
Efectuadas as dúas probas de determinación do grao de impregnación alcohólica, que arroxaron un resultado positivo de 0,75 mg/l en aire expirado na primeira proba e 0,68 mg/l na segunda, procederon a denuncialo.