O alcalde de Vigo, Abel Caballero, anunciou este mércores que enviaron unha carta ao Ministerio de Fomento para que inste a Autoestradas do Atlántico (Audasa) a “reforzar” os pasos elevados sobre a AP-9 para que poidan circular vehículos.
Abel Caballero explicou que durante 25 anos circularon os vehículos polos pasos elevados de Xorxa e Trapa, ambos no barrio de Teis, pero que hai unhas semanas o Concello “prohibiu” o paso de coches “en atención á seguridade”. “A unha petición de información do Concello, Fomento contestou que os pasos de Xorxa e Trapa non están autorizados para vehículos, polo tanto prohibimos o paso en atención á seguridade”, detallou o alcalde.
Con todo, o rexedor vigués manifestou que ao impedir o paso de vehículos os veciños teñen que dar unha volta de dous quilómetros para ir dunha zona a outra do barrio pola presenza da autoestrada. “Non vou permitir que mutilen unha parte da cidade”, aseverou Caballero, que solicitou a Fomento que inste a Audasa a reforzar ambos os pasos elevados para restaurar a circulación de automóbiles de entre cinco e oito toneladas.
“A autoestrada está obrigada a construír pasos elvados que permitan a circulación de vehículos”, asegurou Caballero, que insistiu en que non deixará que a cidade quede “mutilada” pola “ineficiencia de Audasa”. Esta situación está a provocar numerosas protestas dos veciños que aseguran que quedan divididos e impedidos de facer a súa vida cotiá.
