A coordinación entre os servizos de Oncoloxía Radioterápica, Radiofísica e Cardiología da área Sanitaria de Vigo permitiu realizar con éxito a primeira ablación cardíaca mediante radioterapia estreotáctica, unha técnica innovadora realizada en poucos hospitais de España destinada ao tratamento de arritmias ventriculares resistentes.
Segundo informou o Servizo Galego de Saúde (Sergas) nun comunicado, a intervención tivo lugar hai un mes, mostrando o paciente nestas semanas unha evolución favorable, permanecendo en réxime ambulatorio e sen necesidade de novos ingresos e medicación hospitalaria. Este tipo de arritmias, indica, son aquelas alteracións do ritmo cardíaco que non responden os tratamentos convencionais. A nova técnica, realizada por Aldara Candal, Pablo Rodríguez e María Cespón, permite tratar de forma non invasiva determinadas arritmias potencialmente mortais mediante a administración de altas doses de radiación sobre o tecido responsable da alteración do ritmo cardíaco.
“É un procedemento non invasivo que emprega radioterapia de alta precisión, consistente en aplicar unha dose moi alta de radiación sobre a zona exacta do corazón que está a provocar a arritmia, sen necesidade de abrir o tórax nin introducir catéteres invasivos”, explicaron os responsables.
