A unidade de Cardiología Intervencionista do hospital Álvaro Cunqueiro de Vigo realizou, por primeira vez en España, o implante dun novo tipo de válvula no corazón para tratar a insuficiencia aórtica. Trátase dun dispositivo novo, ‘Jenavalve’, deseñado especificamente para o tratamento da insuficiencia aórtica sintomática grave en pacientes con risco cirúrxico.
Segundo indica a Xunta nun comunicado, os especialistas implantaron con éxito tres válvulas a tres pacientes, que xa están dados de alta e evolucionan favorablemente. O xefe de sección da unidade, José A. Baz, subliñou que esta nova válvula é a primeira aprobada especificamente para esta patoloxía. “Ata agora utilizábanse as mesmas TAVIs que se empregaban para tratar estenosis aórtica, pero os resultados eran moi variables e existía risco de complicacións. A achega fundamental desta nova válvula é o seu mecanismo de fixación, con tres clips ou pinzas que fan que o seu sistema se ancoraxe sexa completo e seguro”, reivindicou Baz.
“Estamos moi satisfeitos cos primeiros resultados xa que supón un avance moi importante para os pacientes, porque agora podemos ofrecerlles un tratamento eficaz e seguro fronte a unha patoloxía que carecía dunha terapia apropiada”, engadiu, explicando que se trata dun procedemento “minimamente invasivo”. O Goberno galego indicou que a insuficiencia aórtica prodúcese cando a válvula aórtica non pecha ben, polo que o sangue no canto de fluír polo seu circuíto, volve ao ventrículo esquerdo. Isto fai que o corazón teña que bombear sangue extra e dilátese para adaptarse, xerando síntomas como fatiga, afogamento ou hinchazón nas pernas ao paciente.
