O Concello de Vigo formalizou a doazón de dous camións de bombeiros a Ucraína, atendendo unha petición do cónsul honorario do país en Galicia. Trátase de dous camións retirados recentemente do servizo municipal, ao ser substituídos por vehículos máis modernos, que están en perfecto estado de funcionamento e que este mesmo luns partiron cara a Ucraína.

O alcalde, Abel Caballero, acudiu este luns ao Parque Central para asistir á saída dos vehículos e explicou que poderán ser utilizados en tarefas de emerxencia e rescate. “Queremos contribuír á atención das persoas en Ucraína e apoiar unha causa nobre, digna e xusta“, explicou o rexedor, que tamén trasladou “todo o apoio e afecto de Vigo ao pobo ucraíno”.

Pola súa banda, o cónsul honorario de Ucraína en Galicia, Antonio Corredoira, agradeceu a colaboración do Concello e explicou que os camións se usarán en labores de rescta en zonas próximas á fronteira. “Están a sufrir bombardeos continuos e estes vehículos van ser de gran utilidade para salvar vidas e atender ás emerxencias”, explicou. Deste xeito, un dos camións irá destinado á cidade portuaria de Ochakiv, no sur de Ucraína, na provincia (óblast) de Mykolaiv; e o outro irá para o Hospital Militar de Kharkiv, cidade de 1,4 millóns de habitantes no leste do país.