A Comisión de festas da parroquia viguesa de Matamá respira máis tranquila tras o auto xudicial que decretou o sobresemento parcial e provisional con respecto ao seu presidente, Cristian González, da causa aberta polo accidente mortal ocorrido en agosto de 2024 na atracción Saltamontes, e fixo un chamamento á “unidade” de todas as comisións de festas populares de Galicia, para que aborden as súas funcións e “ata onde chega” a súa responsabilidade.

En declaracións aos medios, Cristian González insistiu, do mesmo xeito que fixo durante o proceso de instrución xudicial (no que figurou como investigado, xunto co dono da atracción, a concelleira de Seguridade, o xefe da Policía Local e o xefe da área de Seguridade do Concello de Vigo) en que o labor da comisión de festas é “manter a tradición” dos festexos na parroquia de Matamá, pero non ordenar o precinto dunha atracción que non estaba autorizada.

Tras agradecer “todas as mostras de apoio” recibidas nestes case dous anos de instrución xudicial, sinalou que o ocorrido pode servir de axuda e exemplo para todas as comisións de festas populares, que “se teñen que seguir mantendo” para preservar a tradición duns eventos que son “un ben cultural”. Precisamente por iso, fixo un chamamento á unidade e anunciou a convocatoria, aínda por pechar, dun encontro de comisións de festas de toda Galicia o próximo 30 de maio en Santiago.

FOMENTAR A UNIDADE

A finalidade dese encontro é abordar as funcións das comisións, e fomentar a unidade “para facer fronte ao día a día”. “Isto que nos tocou vivir a nós pódese pasar a calquera comisión”, apuntou. Preguntado acerca de se o ocorrido en agosto de 2024 influíu na forma de proceder da comisión, Cristian González sinalou que a organización se centrou en “manter a festa, fose máis grande ou máis pequena”, e lembrou que o accidente mortal e o proceso xudicial posterior afectou máis ben á vida persoal dos integrantes da Comisión.

Con todo, e a pesar da “satisfacción” pola decisión do xuíz, recoñeceu que se trata “dunha batalla máis” e que, mentres o caso non estea pechado do todo con respecto á comisión, continúa o “momento de incerteza”.