A empresa pesqueira viguesa Profand, provedor galego de Mercadona, alcanzou un acordo con Alantra Private Equity e os demais accionistas para a compra do canario Grupo Unión Martín. Segundo informa a compañía galega nun comunicado, a operación, pendente de cumprimento de determinadas condicións, “enmárcase dentro da estratexia de Profand de consolidar o seu negocio no ámbito do peixe e impulsar a súa industrialización en Canarias“.

Grupo Unión Martín é un operador especializado na captura, procesado e comercialización de produtos do mar, con sede nas Palmas de Gran Canaria. Esta operación inclúe a actividade tanto do Grupo Unión Martín nas Palmas como a de Silomar en Valencia, esta última adquirida por Unión Martín no ano 2022 e que conta cunha planta de procesado e cámaras frigoríficas cunha superficie total de 19.000 metros cadrados.

ESTRATEXIA DE CRECEMENTO E INDUSTRIALIZACIÓN

Con esta compra, Profand reforza a súa presenza tanto na península como no arquipélago e avanza no seu obxectivo de seguir desenvolvendo un proxecto industrial sólido e con vocación de longo prazo no mercado canario. O conselleiro delegado de Profand, Enrique García Chillón, destacou que “esta operación responde á vontade da compañía de seguir crecendo de forma ordenada, reforzando a súa capacidade industrial e a súa presenza en mercados estratéxicos como Canarias”.

García Chillón engadiu que a incorporación de Unión Martín encaixa plenamente na súa folla de ruta e permítelles seguir construíndo un proxecto de referencia no negocio do peixe, cunha clara aposta polo investimento e a xeración de valor a longo prazo.