Por outra banda, a Consellería de Educación, Ciencia, Universidades e FP deu este martes o pistoletazo de saída ás obras de construción do futuro IES Domingo Villar no barrio vigués de Navia, unha infraestrutura que conta cun investimento autonómico de 18 millóns de euros e que, se se cumpren os prazos, estará rematada en 21 meses.
O presidente da Xunta, Alfonso Rueda, foi o encargado, xunto con varios membros da familia do escritor, de colocar a ‘primeira pedra’ desta dotación, simbolizada por unha urna na que se introduciron os xornais do día, un plano do barrio de Navia e da actuación, e un exemplar, en galego, da súa primeira novela, ‘Ollos de auga’.
O titular do Executivo galego cualificou como “un acto de xustiza” dar ao novo IES —o primeiro no barrio de Navia— o nome do escritor, falecido en 2022, e lembrou que se trata do primeiro instituto construído de raíz seguindo os criterios do plan de nova arquitectura pedagóxica da Xunta.
Rueda sinalou que o barrio de Navia se converteu no “pulmón” do crecemento da cidade olívica e, por iso, a Xunta está a facer un “gran esforzo” no eido da vivenda, con centos de novas vivendas de promoción pública en marcha. Ese aumento de veciñanza na zona debe vir acompañado de novos servizos, como o novo centro educativo, que contará con 22 unidades docentes de ESO e Bacharelato e que atenderá 700 alumnos.
PROTESTA DE DOCENTES EN FAIXA
Tanto o presidente da Xunta como o conselleiro de Educación, Román Rodríguez, que tamén participou no acto, foron recibidos por un grupo de docentes en folga que os increparon reclamando melloras no sistema educativo, máis investimento para o alumnado con diversidade e outras reivindicacións.
A portavoz do colectivo, a mestra de Primaria Yolanda Cobas, lembrou que os docentes, nesta xornada de folga, seguen reclamando medidas para “mellorar a calidade da educación pública para todas e todos”. Así, reiterou que entre as demandas figura unha maior dotación de recursos para o alumnado con diversidade e necesidades especiais, e medidas para “revalorizar a profesión docente, que quedou desvalorizada por tarefas excesivas que non lle corresponden e por unha forte burocratización”.
