O Foro Socioeducativo As Ninguéns e a Federación de Asociación de Veciños Eduardo Chao (Favec) concentráronse este xoves ante as portas do Concello de Vigo para solicitar habitacións para persoas sen fogar tras o desaloxo dunha trintena de ocupas da antiga nave de Pescanova situada na contorna de Beiramar.

A partir das 11.30 horas desta mañá, preto dunha vintena de persoas protestaron na Praza do Rei pola situación “crítica” que viven estes cidadáns, que foron “desaloxados” para “deixalos na rúa” sen ofrecerlles unha alternativa. A berros de ‘Abel, actúa, que tes xente na rúa’  ou ‘O pan, o teito, para todos un dereito‘, os manifestantes solicitaron ao alcalde, Abel Caballero, a creación de polo menos 50 novas habitacións individuais con cama, armario, masilla de noite e mesa de estudo.

Tamén solicitan a eliminación dunha conduta “cruel” que supón que as persoas só poidan estar entre 10 ou 15 días de máximo nos albergues municipais, urxindo alternativas de duración indefinida ata que se solucionen os problemas de cada individuo que os levou a acabar durmindo na rúa. Desde estes colectivos criticaron que un concello “rico” como é Vigo, que dispón de “superávit”, non sexa capaz de ofrecer unha mellor alternativa para os seus cidadáns máis desfavorecidos.

Eles insisten en que “non se trata dun caso illado” senón que é un “problema” que sofre a cidade e que as administracións públicas deberían pór o foco nel. “As persoas sen teito nesta cidade necesitan dunha vez por todas que se aumente un dispositivo residencial con máis de 50 prazas con habitacións individuais amobladas”, subliñou Antón Bouzas, portavoz das Ninguéns.