A segunda edición do Galicia Fest, que se celebra en Vigo os días 26 e 27 de xuño, dá por pechado xa o seu cartel coa incorporación de Lori Meyers, Coti e Beira Fauna. Ademais, súmase á programación o DJ José de Rico. Deste xeito, o escenario que se montará no Peirao de Transatlánticos de Vigo —cun ancho de 18 metros e un aforamento de entre 6.500 e 7.000 persoas— acollerá o venres as actuacións de La Reina del Flow, Coti, Maryland, Miriam Rodríguez, Pablo Lesuit, Sabela e José de Rico.

O sábado será a quenda de Juan Magán, Lori Meyers, Taburete, Álvaro de Luna, Carla Lourdes, Fredi Leis, Marlena e Beira Fauna. O evento conta co apoio da Xunta de Galicia e da Deputación de Pontevedra. Segundo explicou o director do festival, Antonio Casal, a venda de entradas, tanto de abonos como de días individuais, “vai a bo ritmo” de cara á cita do vindeiro mes.

Pola súa banda, o director de Turismo de Galicia, Xosé Merelles, destacou que este evento converterá a Vigo en “capital do indie e do pop” a finais de xuño e en “polo de atracción” para os visitantes. Así mesmo, suliñou que, tras o éxito da edición de 2025, a previsión é que o Galicia Fest tamén triunfe este ano na cidade olívica. A vicepresidenta da Deputación, Luisa Sánchez, fixo un chamamento a acudir ao festival e puxo en valor a calidade dos grupos e artistas confirmados.