O Tribunal de Instancia, sección Penal, número 2 de Vigo acollerá este luns un xuízo contra dous acusados de ameazas e extorsión. Segundo o escrito de acusación da Fiscalía, os procesados intimidaron a un home que contactara, a través dun anuncio nunha páxina web, cun teléfono de citas, logrando que lles pagase un total de 1.450 euros. O ministerio público sostén que os acusados actuaron “seguindo un plan preconcibido” ao colocar o anuncio para “inducir a erro ás persoas interesadas nos servizos ofertados”. Os feitos remóntanse ao 13 de maio de 2022, cando a vítima contactou vía WhatsApp co número que figuraba na web. Aínda que o prexudicado borrou o contacto, tres días despois os acusados comunicáronse con el facéndose pasar polo xefe de seguridade dun piso privado de citas.

Para amedrentar a vítima, os dous homes dixéronlle que o xefe da organización estaba “enfadado” porque finalmente non contratara ningún servizo tras o contacto inicial. Co obxectivo de extorsionalo, ameazáronlle con facer públicos os seus datos, os contactos e as conversas realizadas se non realizaba os ingresos que lle exixían. Ante o temor de que a información saíse á luz, o home transferiulles 1.450 euros repartidos en varias contas bancarias. A Fiscalía cualifica estes feitos como un delito de ameazas ou, de xeito alternativo, de extorsión. Por este motivo, pide para cada un dos acusados unha pena de 2 anos de prisión. Así mesmo, solicita que ambos indemnicen conxuntamente á vítima coa contía estafada máis os intereses legais correspondentes.