O Pleno do Concello de Vigo deu luz verde este luns á ordenanza de regulación das vivendas de uso turístico (VUT), co voto contrario de PP e BNG. A normativa foi defendida pola concelleira de Urbanismo, María José Caride, quen subliñou que a nova normativa persegue garantir o acceso á vivenda residencial, manter a convivencia e achegar seguridade xurídica. Segundo explicou, o crecemento do turismo urbano afectou ao acceso á vivenda e “tensionou os prezos”, o que fai necesaria esta regulación.
A ordenanza recolle que só poderán implantarse VUT en edificios de uso completo destinado a este fin ou en plantas altas e baixas, sempre que se garanta a independencia de acceso respecto das vivendas residenciais. Por outra banda, non se permitirá a súa implantación naquelas que foran obxecto de rehabilitación con axudas públicas nin nas que conten con protección pública. Ademais, o Concello poderá declarar certas áreas ou rúas como “zonas saturadas ou de intensidade limitada”. Finalmente, a norma foi aprobada cos votos do goberno socialista e o voto en contra da oposición, tras ser rexeitado un voto particular do BNG.
CRÍTICAS DA OPOSICIÓN
O grupo municipal do PP criticou que o goberno local “chega tarde” e advertiu de que a ordenanza “recorta dereitos individuais”, cualificándoa de “expropiación regulatoria encuberta”. A portavoz popular, Luisa Sánchez, definiu a norma como unha “cortina de fume” para ocultar a falta de planificación dun executivo que “leva 18 anos sen política de vivenda”, e asegurou que limitar as VUT non baixará os prezos sen investimento público.
Pola súa banda, o portavoz do BNG, Xabier Pérez Igrexas, acusou ao goberno de pretender facer crer que controla un “fenómeno ultraespeculativo” con medidas “moi laxas”. O edil nacionalista lembrou que en Vigo hai máis de 2.400 VUT e que non se realizou nin unha soa inspección no últimos tres anos. Para o Bloque, a cidade necesita unha ordenanza máis “valente”, incidindo en que existen cinco vivendas turísticas por cada unha dispoñible para aluguer convencional.
