O alcalde de Vigo, Abel Caballero, mantivo este mércores contacto con responsables das aerolíneas Binter, Wizz Air, Volotea e Vueling, para explorar a posible implementación de novas rutas desde o aeroporto de Peinador, aínda que insistiu en que tanto Xunta como Deputación de Pontevedra, deben cofinanciar, a partes iguais co Concello, eses voos.
En declaracións remitidas aos medios, o rexedor explicou que o interese do goberno local está nas rutas internacionais a Londres, París ou Milán, e en voos nacionais como Valencia, Bilbao ou Sevilla. “A porta está aberta”, apuntou Caballero, que asegurou que as compañías (Vueling, Wizz Air e Volotea) teñen “moitísimo interese en todos os destinos nos que Vigo tamén ten interese”.
“Deixamos xa todo aberto para os efectos de que fagan propostas, de que empecemos a dialogar, que vexamos o tipo de axudas que necesitan e, claro, Vigo é un aeroporto e un destino do maior interese”, proclamou o alcade.
Con todo, reiterou a súa petición a Xunta e Deputación para que cooperen economicamente para financiar estas conexións. “Ese envite político xa está presentado publicamente”, sinalou.
No caso de Binter, que xa opera voos desde Vigo, Caballeor explicou que o seu encontro deste xoves serviu para “estreitar a relación e acordar mecanismos de promoción para voos e para que máis xente viaxe entre Vigo e Canarias”.
