Os puntos de atención continuada (PAC) da área sanitaria de Vigo atenderon un total de 14.579 urxencias entre o 23 de decembro e o 6 de xaneiro, cun nivel de resolución media do 90 %. Segundo informou o Sergas, a PAC con maior actividade nestas datas foi a de Vigo, con 4.064 urxencias atendidas, seguida polas do Porriño (1.681), Ponteareas (1.575), Cangas-Moaña (1.538) e Val Miñor (1.531). Este período de Nadal destaca por ser un dos de maior presión asistencial, unha situación que neste exercicio 2025-2026 se viu intensificada pola coincidencia co momento de maior expansión da gripe.

Neste sentido, na PAC de Vigo as xornadas con máis afluencia de todo o ano concentráronse nestas festas, destacando o 28 de decembro con 449 urxencias, o 27 de decembro con 438 e o 5 de xaneiro con 431 atencións. Se analizamos o conxunto do ano 2025, os nove centros da área viguesa rexistraron un total de 285.629 atencións, das cales 73.741 corresponderon unicamente á PAC da cidade olívica.

O Sergas puxo en valor a “alta capacidade resolutiva” da Atención Primaria e dos seus profesionais ao dar resposta autónoma á práctica totalidade das urxencias sen necesidade de derivar aos pacientes ao ámbito hospitalario. Respecto diso, Sanidade informou de que a porcentaxe de derivación a hospitais desde as PAC da área viguesa sitúase nunha media de tan só o 10 %. Igualmente, destacouse o papel fundamental da rede de centros de saúde para facer fronte a este “esixente período” e subliñouse que a actividade puido resolverse grazas ao esforzo dos profesionais e á solidez da rede de Atención Primaria.