O alcalde de Vigo, Abel Caballero, volveu a insistir en pedir un encontro coa Xunta e a Deputación de Pontevedra para falar sobre o financiamento das infraestruturas necesarias para que a cidade sexa sede do Mundial de Fútbol 2030, polo que o ente provincial pediulle que faga públicos os proxectos e os prazos que di ter o rexedor.
Nun audio remitido aos medios de comunicación, o alcalde informou de que enviou outra carta ao presidente do Goberno galego, Alfonso Rueda, e da Deputación, Luís López, para reclamarlles unha reunión “ao máximo nivel” para abordar este tema. Segundo Caballero, o proxecto técnico e os prazos de execución “avanzan”, polo que, para el, un acordo sobre o financiamento é a “cuestión pendente” para completar as “garantías” da candidatura.
A proposta municipal contempla un investimento global de máis de 107 millóns de euros, que o Concello pretende que sexa paga a partes iguais entre goberno local, provincial e autonómico, o que supón uns 38,5 millóns cada administración. Todo isto para levar a cabo unha nova obra na bancada de Tribuna e para executar as accións necesarias para cumprir cos parámetros esixidos pola FIFA.
Abel Caballero dixo que o proxecto básico da nova bancada continúa avanzando e a planificación municipal “permite cumprir cos prazos requiridos“. “O resto está garantido todo”, dixo o alcalde, insistindo na necesidade de pactar o financiamento.
Con todo, estas palabras de Caballero non tardaron en ter resposta da vicepresidenta da Deputación, Luisa Sánchez, que lle preguntou ao alcalde que, de ter eses proxectos e eses prazos como di, por que non os fixo públicos. Sánchez reivindicou que a FIFA quererá coñecelos cando visite Vigo, xa que, ao seu xuízo, “non vai preguntar só polo diñeiro”, senón tamén por prazos e proxectos. “O plan de Caballero esixe compromisos, pero non asume ningún”, criticou a tamén presidenta do PP de Vigo.
“Dá a impresión de que o alcalde non lidera a súa candidatura, senón que necesita que a Deputación e a Xunta sálvenlla”, sentenciou Sánchez nun audio enviado aos medios.
