O alcalde de Vigo, Abel Caballero, fixo balance do que cualificou como “o mellor ano da historia” para a cidade, reivindicando que a urbe olívica “está no mapa como nunca antes”. En ata 15 audios enviados aos medios de comunicación —un por cada área de goberno— o rexedor subliñou que o 2025 estará sempre marcado para Vigo pola súa “débeda cero” e pola aprobación duns orzamentos marca para o vindeiro exercicio. “A cidade vive unha marcha da economía excepcional, con avances notables na creación de emprego, nas humanizacións, no medio ambiente e na construción do Vigo Vertical“, declarou.

Entre os fitos do ano, Caballero salientou a aprobación do Plan Xeral de Ordenación Municipal (PXOM), unha ferramenta que definiu como “clave” para transformar Vigo nun modelo de cidade verde e dotacional, blindada contra a especulación. Este plan, xunto coas obras de mobilidade mecánica, constitúen o eixe central da súa estratexia para consolidar o crecemento da cidade e mellorar a calidade de vida dos veciños nas distintas parroquias e barrios.

O alcalde aproveitou o balance para cargar de novo contra a Xunta de Galicia, lamentando que o Goberno galego “non dedica practicamente nin un euro” a fomentar o comercio local en Vigo. Segundo Caballero, o comercio de proximidade enfróntase a dous “adversarios” principais: a falta de apoio da administración autonómica e a competencia de Amazon. Sobre esta última, sinalou que se trata dunha “dinámica nova á que hai que facerlle fronte” para protexer o tecido empresarial da cidade.