A Xunta de Galicia defendeu o “papel estratéxico” da Axencia Europea de Control da Pesca (EFCA), con sede en Vigo, para defender a sustentabilidade e a explotación responsable dos recursos pesqueiros. Así o trasladou a conselleira do Mar, Marta Villaverde, con motivo dunha visita á sede da EFCA, onde mantivo un encontro coa súa directora executiva, Susan Steele. Ambas abordaron a cooperación entre a administración autonómica e o ente comunitario, e analizaron o traballo operativo da Axencia a través dos seus Plans de Despregamento Conxuntos, así como o seu impacto na frota galega.

Marta Villaverde subliñou a importancia de manter unha coordinación estreita entre a EFCA e Galicia, especialmente nun momento marcado pola entrada en vigor de novas disposicións do Regulamento de Control da Pesca, o impulso á dixitalización dos sistemas de vixilancia e a redefinición das políticas comunitarias a través da revisión da Política Pesqueira Común (PPC). A conselleira tamén destacou o papel de Galicia como “referente europeo” no control pesqueiro, grazas ao Servizo de Gardacostas e á cooperación coa EFCA en operacións de inspección.