O grupo municipal do BNG en Vigo reclamou este martes a conxelación dos salarios dos cargos electos ante o incremento do 4% previsto nos orzamentos de 2026. Para os nacionalistas, esta suba é “inxustificada” xa que as retribucións actuais son “elevadísimas”.

O portavoz do BNG, Pérez Iglesias, sinalou que as contas municipais, aprobadas inicialmente co voto en solitario do PSOE, contemplan soldos de máis de 70.000 euros para os concelleiros con dedicación exclusiva e máis de 80.000 euros para o alcalde, Abel Caballero. Pérez Igrexas subliñou que o incremento é “especialmente inxusto” nun contexto de dificultades económicas para as clases populares e traballadoras, xa que case 60.000 persoas en Vigo están en risco de pobreza ou exclusión social. O BNG tamén lembrou que eses mesmos orzamentos prevén un aumento do 4% nas taxas e impostos municipais.

Para o grupo municipal, conxelar os soldos debe ser o “primeiro paso” para abrir un “debate necesario” sobre a racionalización das retribucións de todos os cargos políticos, incluído o persoal de confianza. O portavoz criticou os salarios do persoal ligado á Alcaldía, algúns con “vínculos familiares directos co goberno local”, con soldos que oscilan entre 35.000 e 50.000 euros. Pérez Igrexas recalcou que “a política non é unha profesión”, e é incompatible con privilexios económicos.

O SALARIO DOS EDÍS SOBE IGUAL QUE O DO RESTO DE EMPREGADOS PÚBLICOS 

O goberno municipal de Vigo fixo público un comunicado, tras a solicitude do BNG de que se conxelen os salarios dos cargos públicos do Concello o próximo ano, no que defende o incremento das retribucións para 2026. Así, aclarou que “o salario dos edís sobe o mesmo que o do resto de empregados públicos do Estado” e que “o incremento das retribucións de alcaldes e concelleiros defínese nos Orzamentos Xerais do Estado ou nun decreto-lei“.

De feito, insistiron fontes municipais, o Consello de Ministros aprobou este martes a subida salarial para este ano, un 2,5 %, e dun 1,5 % para o ano 2026, e “as administracións non poden subir o soldo dos seus empregados máis desa porcentaxe, que é o mesmo para toda España”.

Con respecto á cifra que se recolle nos orzamentos de Vigo para 2026 para o soldo do alcalde (81.522 euros anuais), o goberno municipal explicou que “é unha previsión do incremento desde a súa toma de posesión, é dicir, desde xullo de 2023, e ata o final de 2026”, o que supón unha subida acumulada do 7,66 %, “como a de todos os empregados públicos.