A sección quinta da Audiencia Provincial de Pontevedra, con sede en Vigo, condenou a tres novos a penas de 7 meses e 2 anos de prisión como autores do delito de lesións, tras propinar unha malleira a dous mozos nunha zona de copas da cidade, en febreiro de 2024. Os tres procesados, Diego M.R., Abraham C.V. e Luís V.N., recoñeceron os feitos nunha vista de conformidade celebrada este martes, na que a Fiscalía rebaixou a súa petición de penas ao aplicar a atenuante de reparación do dano, xa que o tres consignaron 10.000 euros para facer fronte á indemnización a unha das vítimas.
Os feitos ocorreron na madrugada do 9 de febreiro do ano pasado, cando os acusados, con outras persoas que non foron identificadas, arremeteron contra un mozo, cuxa noiva fora parella sentimental dun dos procesados. Así, tirárono ao chan e propináronlle golpes, patadas e dentadas por todo o corpo.
Ademais, un dos acusados, Luís V.N., practicante de boxeo (deporte no que estaba federado), tamén golpeou a outro mozo, acompañante do anterior mozo, rompéndolle a mandíbula e causándolle lesións nas pezas dentais. Por estes feitos, o tres foron condenados a 7 meses de cárcere, polo delito de lesións cometido sobre a primeira vítima, coa atenuante de reparación do dano e a circunstancia agravante de abuso de superioridade. Así mesmo, deberán inmdenizar ao prexudicado en 10.000 euros (xa consignados).
No caso de Luís V.N., a Audiencia condenouno, a maiores, a outros 17 meses de prisión (24 meses de cárcere en total), polas lesións ao segundo mozo, coa circunstancia agravante de abuso de superioridade. Nese caso, ademais, deberá indemnizar á vítima en 22.000 euros. No caso de Diego e Abraham, o tribunal acordou a suspensión da execución da pena de cárcere por un tempo de 2 anos, a condición de que, nese tempo, non delincan. Para Luís V.N. tamén se acordou a suspensión da pena de prisión, neste caso durante 5 anos, a condición de que non cometa delito nese período e de que pague a indemnización de 22.000 euros, a razón de 300 euros ao mes desde o próximo xaneiro.
