O conselleiro de Emprego, Comercio e Emigración, José González, urxiu este martes ao Concello traballar para potenciar o Instituto Feiral de Vigo (Ifevi): “Non imos seguir esperando máis”. Así o sinalou ante os medios de comunicación antes de asistir a unha reunión do Padroado do Ifevi, onde se dará conta da situación actual do organismo.

Para González, “xa se acabou a espera” tras case un ano desde que se alcanzase un acordo entre Xunta, Concello e Zona Franca para desenvolver no Ifevi un modelo de goberno a tres bandas de forma “equilibrada”. Segundo o conselleiro, sen saber “por que”, este ano o Concello “desmarcouse do acordo”. “Non imos seguir esperando máis. Queremos avanzar na potenciación do Ifevi”, insistiu.

Por iso, reivindicou que o Padroado contará cos usuarios do recinto feiral para desenvolver un Plan Funcional e un Plan Estratéxico do Ifevi. Tamén falou da valoración do prezo de mercado das actuais instalacións, indicando que o achegado pola Xunta supón 20,6 millóns de euros, mentres que ao Concello correspóndenlle 14,9 millóns. Sendo, segundo dixo, unha valoración do propio Padroado, “non da Xunta de Galicia”.