A Xunta de Goberno Local de Vigo aprobou este luns nunha sesión extraordinaria a licitación do contrato de mantemento e conservación das zonas verdes da cidade, un contrato que terá unha duración de 5 anos e un valor duns 65 millóns de euros.

Segundo sinalou o alcalde, Abel Caballero, en declaracións remitidas aos medios, este contrato contempla o mantemento dos parques forestais, os grandes parques urbanos, zonas verdes de rotondas, medianas e xardineiras, e o conxunto do arboledo da cidade. O rexedor lembrou que Vigo conta agora con máis zonas humanizadas e é unha cidade “cada vez máis verde”, que require de “un maior mantemento”.

Por iso, o servizo pasará de 110 a 146 traballadores, o que “significará unha mellor atención”, segundo Abel Caballero, que insistiu en que este contrato será “unha notable mellora das zonas verdes” na cidade.