Os sindicatos JUPOL e CSIF denunciaron ante a Inspección de Traballo a situación que se vive na Comisaría de Policía Nacional de Vigo, con temperaturas extremas debido ao deficiente funcionamento da climatización, e que chegaron a superar os 35 graos este verán.

A través dun comunicado, os sindicatos lembraron que se está expondo aos traballadores e aos cidadáns a moi altas temperaturas, lonxe das recomendadas e das que fixa a normativa de prevención de riscos laborais. Unha situación que veñen denunciando desde hai semanas tanto estas organizacións como outras, con protestas como a concentración levada a cabo a principios de xullo fronte ás instalacións policiais.

Ademais da “calor sufocante”, engadiron que, no inverno, as temperaturas chegaron a baixar ata os 5 °C, cun sistema de climatización “avariado desde hai anos”. “A reparación, cifrada nuns 50.000 euros segue sen executarse a día de hoxe”, denunciaron, e explicaron que a estrutura do edificio, con grandes cristaleiras e pouca ventilación, agrava o problema “e provoca tensión térmica, que produce síntomas como fatiga, mareos ou problemas respiratorios, especialmente perigosos para persoas con patoloxías previas”.

Os sindicatos advertiron de que este non é un problema puntual, senón que se trata dunha “vulneración continuada da normativa laboral e dos dereitos básicos dos traballadores”, polo que esixen unha “actuación urxente” por parte da Inspección de Traballo.