A Confederación Intersindical Galega (CIG) lamentou a firma do preacordo de convenio entre a multinacional pesqueira Nova Pescanova e os sindicatos UGT e Comisións Obreiras (CC.OO.) porque supón, ao seu xuízo, unha “perda de dereitos para os traballadores”.

Segundo indica, a CIG non asinou o acordo porque “a empresa manifestou que co incremento salarial pactado, insuficiente, terminaba a negociación económica deste convenio e aínda faltan por negociar todos os pluses, a compensación das horas extra, os permisos retribuídos e demais”.

En relación co traballo de domingos e festivos, a CIG rexeitou que a empresa “pretenda despachalos cun plus de 50,78 euros, que é inferior ao que se cobraba a día de hoxe nos centros industriais”.

“A proposta implica que o domingo só cóbrese en proporción ás horas que se traballen, o que supón unha renuncia ao que xa se gañou en sentenza firme, nalgúns centros, que non é outra cousa que cobrar o plus de domingo completo, independentemente do tempo que  vaia traballar”, apuntou o sindicato.

Entre outros temas, criticaron que non estea recoñecida a condición máis beneficiosa de centros como Arteixo, que implica cobrar horas extra e xerar un día de vacacións en caso de traballar un festivo.

“O futuro convenio estatal do grupo Nova Pescanova non inclúe nin horarios de traballo nin período no que gozar as vacacións do verán”, insistiu a representación sindical, indicando que actualmente están limitadas a xuño e setembro e, fóra do período, a empresa paga unha penalización de 200 euros.

“O que veñen de asinar a empresa e os seus cómplices é que, na práctica, as vacacións vanse a coller cando a empresa decida, sen penalizacións”, sentenciou a CIG.

Todo iso días despois de que Nova Pescanova, CC.OO. e UGT alcanzasen un acordo que inclúe melloras salariais e redución de xornada para os empregados, segundo subliñaron estes dous sindicatos, co obxectivo de “desbloquear” a negociación do convenio, que continuará tras o verán.