A campaña Recollida Primavera da Fundación Provincial Banco de Alimentos de Vigo, celebrada os pasados 23 e 24 de maio en supermercados Alcampo e Carrefour de toda Pontevedra, recadou máis de 50.000 quilos de alimentos, o que representa un 15% máis que na edición de 2024.

Segundo informou a organización, esta cifra é o resultado de sumar os produtos físicos entregados a pé de supermercado e as achegas económicas recibidas nas distintas cadeas de alimentación participantes. A acción volveu desenvolverse de maneira mixta nos centros Alcampo e Carrefour, mentres que, noutras tendas adheridas como Mercadona, O Corte Inglés e DIA, só se permitiron doazóns dinerarias.