A delegada territorial da Xunta en Vigo, Ana Ortiz, lamentou este martes que os peregrinos que pasan pola cidade seguen tendo problemas para orientarse pola negativa do goberno municipal a sinalizar o Camiño Portugués.

Así o trasladou durante unha visita ao albergue público ‘Juan Manuel López Chaves’, no Berbés, polo que xa pasaron este ano 2.286 persoas (400 máis que no mesmo período de 2024). Desde a súa posta en marcha nun edificio rehabilitado do Casco Vello de Vigo, en 2021, aloxáronse nas instalacións máis de 34.000 persoas.

No que vai de ano, case 18.000 peregrinos que percorreron o Camiño Portugués recolleron o seu ‘Compostela’, aos que habería que sumar aqueles que non recollen a acreditación.

No entanto, Ana Ortiz mostrou a súa preocupación pola falta de sinalización do trazado ao seu paso polo termo municipal de Vigo, o que provoca problemas e confusión nos peregrinos. “Por desgraza, a pesar das promesas, Vigo segue sendo a única cidade de Europa que non ten a ruta sinalizada”, sinalou, e lembrou que na reunión entre Abel Caballero e Alfonso Rueda en xuño do ano pasado, o rexedor comprometeuse a liquidar esta carencia.