A Fundación Provincial Banco de Alimentos de Vigo busca máis de 800 voluntarios para dúas campañas de recollida de comida que levará a cabo os dous últimos fin de semana deste mes de maio.
En concreto, o 23 e 24 de maio Banco de Alimentos organizará a Recollida Primavera en tendas Alcampo e Carrefour de Vigo, Pontevedra, Vilagarcía, Mos, Cangas e Lalín, mentres que o Maio Solidario de Gadis será os días 30 e 31 en Vigo, Pontevedra, Nigrán, Mos, Ponteareas, Marín, Bueu, Tui, Vilagarcía, Cambados e Lalín.
Segundo informou a entidade, serán a únicas ‘Operación quilo’ que se celebren ata a tradicional Gran Recollida, prevista o próximo novembro. De aí a “especial relevancia” que terán ditas accións para a provisión de alimentos básicos non perecedoiros para fornecer a unhas 20.000 persoas durante o verán e principios do outono.
Nesta ocasión, durante a Recollida Primavera, Banco de Alimentos contará coa axuda da Brigada de Infantaría Lixeira (Brilat), que se encargará de transportar todas as doazóns físicas ata o almacén de Lavadores, en Vigo.
Outras cadeas de alimentación como Mercadona, El Corte Inglés, Lidl e DIA tamén se sumarán á Recollida Primavera, aínda que só permitirán doazóns económicas ao pasar por caixa. Durante o Maio Solidario de Gadis, alumnado de varios centros educativos da provincia botarán unha man como voluntarios, así como usuarios de distintos colectivos de inclusión e tamén axentes da Subdelegación de Acción Social da Garda Civil de Pontevedra.
Para ser voluntario e participar nestas campañas solidarias previstas este mes de maio só necesítase dispor de 4 horas e darse de alta en ‘www.bancoalimentosvigo.org‘ ou chamar ao 986 26 30 22.
