A Zona Franca de Vigo busca unha localización alternativa para o World Car Center tras o informe desfavorable de Augas de Galicia para desenvolver este Centro de Automoción nunha parcela da Avenida de Portanet.
Segundo explica o Consorcio, foi en 2020 cando se realizou unha consulta a Augas de Galicia que foi contestada favorablemente sobre a viabilidade da parcela de Portanet para realizar o WCC.
Á vista disto, a Zona Franca puxo en marcha a tramitación do Estudo de Detalle que foi remitido a Augas de Galicia, confirmándose a viabilidade mediante silencio administrativo favorable. “O Estudo de Detalle foi a aprobación definitiva en decembro de 2022, publicouse no DOG e remitiuse aos organismos, incluído Augas de Galicia, sen que conste tampouco recurso algún contra o mesmo”, engade Zona Franca.
Por iso, o Consorcio encargou o proxecto de execución e presentou a solicitude ante Augas de Galicia da autorización previa á licenza, “coa seguridade de que sería aprobada á vista das consultas anteriores xa descritas”. “É só entón cando en xuño de 2024 Augas de Galicia, fronte ao criterio mantido ata ese momento, emite informe desfavorable”, lamenta Zona Franca.
“Desde xuño ata agora estudáronse diferentes alternativas técnicas para tentar adaptar o proxecto ás novas esixencias, concluíndo que eran inviables. Como consecuencia de todo o acontecido, a Zona Franca de Vigo explora xa un novo emprazamento para o WCC na contorna do Polígono de Balaídos, centro do HUB automobilístico do noroeste e o máis importante de España”, sentencia o Consorcio.
