O alcalde de Vigo, Abel Caballero, respondeu este mércores á “man tendida” e á oferta de “colaboración” do presidente da Xunta, Alfonso Rueda, advertindo de que non se debe confundir a “cordialidade e educación” nun acto co “consenso e o acordo”, porque o presidente galego ofrece colaboración mentres “a Xunta discrimina a Vigo”.
Así o trasladou o rexedor olívico nunhas declaracións remitidas aos medios nas que sinalou que “para o presidente da Xunta colaborar e non discutir é o camiño”. “É o camiño se te tratan ben, se te marxinan claro que hai que discutir e denunciar que estamos sendo marxinados. A Xunta marxina a Vigo continuamente”, subliñou Caballero.
Como exemplos, o alcalde lembrou que o goberno galego financiou o 80 % da obra do túnel do Parrote na Coruña, mentres ofrece financiar o 30 % do túnel de Elduayen en Vigo. “A Coruña o 80 % e a Vigo o 30 %, e quere que quedemos calados!”, censurou Caballero.
Por outra banda, lembrou que o paseo inaugurado este martes na fachada portuaria viguesa “pagouno o Goberno de España” e Rueda “nin o mencionou”. Igualmente, acusou á Xunta de paralizar ou atrasar obras como as ramplas de Gran Vía, o túnel de Elduayen, o túnel de Beiramar, o parque infantil do Berbés, e outras actuacións.
Tamén recalcou que, na reforma da ETEA, paga a Zona Franca, e que, na recuperación do teatro cinema Fraga, a Xunta “non fixo nada”, salvo “regalar” máis de 9 millóns a unha entidade financeira (Abanca) que debería ceder o edificio de forma gratuíta á cidade. “Isto é Rueda dicindo falsidades. Estes son os acordos de Rueda: que Vigo o pague todo”, sentenciou Caballero, que volveu a criticar ao presidente galego por non defender a candidatura da cidade para ser sede no Mundial de fútbol de 2030.
RESPOSTA QUE INDICA “COVARDÍA”
Pola súa banda, a delegada da Xunta en Vigo, Ana Ortiz, sinalou que a resposta de Caballero ao ofrecemento de Rueda indica “covardía”, e o único interese de “polemizar coa Xunta sen que lle importe o resultado para a cidade”, todo “enviando un audio desde a súa torre de marfil”.
Ortiz sinalou que esta posición non sorprende, e vén do mesmo alcalde “que ten bloqueada a ETEA, as pistas de atletismo, ou os túneles de Elduayen e Beiramar”. “O mesmo alcalde que suspende reunións técnicas unhas horas antes sen ningunha explicacion, o que aínda non aprobou o PXOM da cidade 6 meses despois de recibir o visto e prace da Xunta, nada novo. Non pretende mellorar a vida dos seus cidadáns, o único que quere son os seus votos, e o resto dálle igual”, sentenciou a delegada.
Con todo, advertiu que o goberno galego seguirá ofrecendo “investimentos” e “apoio” a Vigo, a pesar de que Caballero queira seguir confrontando. “Pero estaría ben que, no canto de audios esaxerando todo, tivese o valor de dicilo á cara cando se atopa, como onte, co presidente da Xunta”, apostilou.
