As novas tarifas do bus urbano de Vigo, servizo que presta a concesionaria Vitrasa, entrarán en vigor este mércores, segundo confirmou a empresa nun comunicado, unha vez que a Comisión de Prezos da Xunta deu luz verde á proposta de incremento remitida polo goberno local.

Así, o billete ordinario do bus pasará de 1,57 a 1,63 euros, mentres que o billete bonificado, para usuarios do cartón Pass Vigo, custará 0,56 euros (ata agora eran 0,53 euros).

Ademais, tamén terán viaxes subvencionadas os usuarios do cartón Pass Vigo que sexan estudantes (0,54 euros), universitarios (0,42 euros), e beneficiarios de tarifa social (0,46 euros). Os pensionistas e persoas con mobilidade reducida (e os seus acompañantes) seguirán viaxando gratis. Estes prezos, en vigor para este 2025, inclúen a bonificación sufragada polo Concello de Vigo e tamén a subvención do Ministerio de Transportes e Mobilidade Reducida.