Os bombeiros de Vigo rescataron a un home que se subiu a un guindastre dun edificio en construción situado á altura do número 59 da rúa Rosalía de Castro da cidade olívica.

Segundo informaron fontes da Policía Nacional, o home chegou a alcanzar a altura do décimo piso. Foi un particular quen, sobre as 19.15 horas, alertou ao 112 Galicia de que había un home adulto, que se atopaba alterado, subido a un guindastre dunha obra a unha altura “importante”.

Con estes datos, os operadores do Centro Integrado de Atención ás Emerxencias deron aviso á Policía Nacional, á Local e aos Bombeiros de Vigo.

Tras un amplo operativo, o home foi rescatado polos bombeiros sen incidentes e os servizos sanitarios trasladárono ao Hospital Álvaro Cunqueiro.