A campaña ‘Somos historias’ da Deputación de Pontevedra, que foi presentada este xoves na Feira Internacional de Turismo (Fitur), promocionará en 2018 a multiexperiencia turística que ofrece a provincia cunha iniciativa que vira ao redor da marquesa de Ayerbe e activista, María Vinyals, figura que, “a medida que se coñece, permite coñecer a Pontevedra das lendas”.
“Todo este mundo ao redor de ‘Somos historias’ xorde pola figura de María. Comezamos a apaixonarnos por esta muller, comezamos a descubrila e, a medida que a coñecíamos, coñecemos a Pontevedra das lendas, da maxia, que ten tanta historia“, destacou a presidenta da Deputación, Carmela Silva.
A presentación da campaña consistiu nun diálogo entre Carmela Silva; a actriz protagonista do vídeo promocional e presentadora do evento, Patricia Torres; e o arqueólogo Diego Piay, quen conversaron sobre o patrimonio cultural e natural máis representativo da provincia, coa figura de Vinyals como fío condutor.
A curtametraxe, que puido seguirse por ‘streaming’ na páxina web de Turismo Rías Baixas e redes sociais, repasa a vida e personalidade de Vinyals, á que define como “unha muller precursora do feminismo, de carácter indomable“, e á que representa lendo e descubrindo numerosos monumentos e paraxes da provincia.
“Loitei pola igualdade e a dignidade das mulleres, coñecín lugares e culturas fascinantes, pero só houbo un lugar ao que chamei fogar, no que atopei descanso. Todos temos un destino, o meu é Rías Baixas“, comenta o personaxe de Vinyals no vídeo.
A continuación, a presidenta provincial subliñou que “os territorios, os pobos, constrúense coas persoas“, e por iso “os pobos son sobre todo historias, grandes historias que contar“, a colación do que convidou a todos os asistentes a “vir e descubrir esta provincia, a través da vida desta muller”.
CASTELO DE SOUTOMAIOR
Dentro dos atractivos turísticos da Provincia, Silva destacou os castelos de Soutomaior e Sobroso, os xacementos, vilas termais, paisaxes, fervenzas e mosteiros. “Somos terra de pedra e auga, e ela, que era unha enorme viaxeira, falaba sempre de Pontevedra, era activista e tamén emprendedora. Era unha muller espectacular”, selou sobre Vinyals.
En relación ao castelo de Soutomaior, onde naceu a marquesa, a presidenta comunicou que o próximo mes de abril inaugurarase o seu musealización, onde, entre outras cuestións, farase referencia a “unha historia de pantasmas” descuberta por esta muller.
A campaña turística tamén fai especial referencia á camelia, flor representativa da provincia e que é “a raíña” do “espectacular” xardín botánico do castelo. Xusto despois, entregouse aos asistentes á presentación unha caixa cun caderno coa imaxe do Castelo de Soutomaior, e galletas e nubes de caramelo.
